sábado, 26 de março de 2011

Recobeilho2


l Douro nun ye só bino
fino, ou cumo naide biu
lhadeiras i bistas guapas:
ye tamien nome dun Riu.

hai melhones d'anhos cuorre
i outros tantos mos dá bida:
fazé-lo inda un Riu mais guapo,
ye essa la nuossa lhida.

barraiges que prénden l Riu,
tamien dan lhetracidade:
mas mie sprança ye que, un die,
ganhe outra beç lhibardade.

ai Douro, que an tues arribas
yá corriu tanto sudor!
quien capaç ye de mirar-te
sien respeito i muito amor?

dízen, Douro, que nun tenes
poetas, solo canseiras:
son ciegos, nun béien ls bersos
screbidos pulas lhadeiras.

quieren, Douro, que tou nome
só por eilhes seia ousado:
son boubos, porque yá seclos
sós por todos nomeado

Fonso Roixo



Sem comentários: